Ujwo nyam ā pịrịrịịrị kaka chị ayida ọlẹrụ ọhẹ ọlẹ kị wụrụ nya Ode, bala Ẹna ịta nyamwụ, bala Ugẹbẹ bala Ekumbyibi.
Ọlẹrụ ọhẹ juwa ki wụrụ nya Ode, ẹ-ẹpwụ nya ẹrụ nyamwụ ọla Ẹna ịta, Ẹna ịwẹ hawụlẹ nya ịlẹhị-lẹhị, ị ka juwa ba ri ang lawule ẹnụ myị ẹnụ. Ugẹbẹ ọhẹ tị juwa oye nya ẹ-ẹga ọọwa. Ịrya nya Ugẹbẹ ọwẹ ri ọka waari, ma ọlẹ kị tị la ịta lẹ ọchọọkpẹ ká.
Ọọwa lẹ, ịrya ọhẹ á wẹ-ẹpwụ nyamwụ jaabwo kọka bwu waa lẹlẹ. Chajị o kele ùbwọmwụ ọ-ka kurwa ká. Ọngịrị nya Ẹna ịwẹ ka kịlọkịla. Ẹpwa nya Ekumbyibi ịhyẹ tị juwa ọnabwọ nya ụ-ụwa. Ekumbyibi ịwẹ jè yẹ lang myị ang jaabwọ kọ haa, ị ká jè yẹ la ọchịnụ lee ụma nya iyo ọnyị myị ọnyị mị. Á jù ugbodu ka, a ká ka ẹpwa nya Ekumbyibi ịwẹ ka, alodu kẹnẹ-kẹnẹ á ti ka je yá lẹ. Ụka ká odu hyị lá eji kịla-ịhụ lẹ, Ugẹbẹ á dọmwụ nya ẹdịyẹ nyamwụ lẹlẹ. Ụka kọ ju ẹpwa nyaa chwẹẹ lẹ, ọnyị nya Ekumbyibi ọhẹ á yọ lẹ, ọ pịrịrịịrị kaka wu-Ugẹbẹ abwọ ẹpwụ áhị lẹlẹ. Ma, Ugẹbẹ jugbodu, ọ rụnyẹ ká, ọọwa lẹ adịda nyaa Ekumbyibi ịwẹ á bwọọ nyị kẹwẹ lẹlẹ. Ugẹbẹ á ya jaa ẹla ọlẹ ko kpọ kele lẹlẹ, ọ tịtọ ka ẹna ịwẹ ká chị ebwo hyị awulẹ, ka Ekumbyibi ka monu jaa nyori nyị hawụlẹ ka, ọ ka ya jaabwọ ki Ẹna ọnyị kọ yang ọnyịịla họhẹ kọ ká mị mọọ jẹ ọọnamwụ ọkịla ka. Ang áhì ọlẹ kọ kpa lẹ ọ ya haa lẹlẹ.
Ahyị-ẹnụ á ka họ kaka lẹ, Ekumbyibi ọhẹ a wẹ ẹga nya Ẹna ọhẹ lẹ, o me ọnụ ọkịịlá ba Ẹna ọkịla lẹlẹ, ọ-ká ẹga nya Ẹna ọkịla, o me ọnụ ọkịịlá ba Ẹna ọkịla ịnyịnyị. Ẹna ịwẹ á kọlọ tawụlẹ woo kakaa , i chebwo hyi awụlẹ lẹlẹ. Ode ayida ọlẹrụ yẹ jaabwọ ka Ẹna ịwẹ á ri lawụlẹ kaka, ọlọ-ẹbyẹbị ma ọ jẹ ang odudu ka. O-ri ọya okpokpo ene ku Ugẹbẹ ọwẹ wụ Ẹna ịwẹ ri ọhọhọhẹ kaka.
Ujwo nyam á chị-ẹgbẹdẹ kọ kwuru mẹ!
Ahị wo ẹla, áhị tawụlẹ woo, chajị áru ọrụrụ nya aligu rì iwe ọdá ha álujì.
Comments