Ang ọdanune a jẹ ya ẹla ịnọ,
ụma nya ala ịlẹ kahị ka wo ka datị-datị.
Ang ọ danune a jẹ ẹla ịno,
ahì ka wo ayị-ọchịchị bala ẹla ọla ikwewe.
Ang ọdanune a jẹ ya ẹla ịnọ,
ahị ka jẹ angị gbe ahụlọ bala angị yẹ-alebyi.
Ahì ka jẹ angị je ịda la odu.
Ahị ka jẹ angị chị-arụ la odu.
Ahị ka jẹ angị wa ákịnawụ ọ-lá akama.
Ang ọdanune a jẹ ya ẹla ịnọ,
ụma nya ala ịlẹ kahị ka wo ka datị-datị.
Ang ọdanune a jẹ ya ẹla ịnọ,
ahị ká jẹ ịhụ bala ịrụ ịlẹ kị hawụlẹ.
Ahị ka jẹ angị mwọ ẹla la odu kì hụlọ áhȕ la ẹnụ.
Àhì ka jẹ ọmwụ nya agbama ọlẹ kị ka a yẹ tawụlẹ la ẹnụ.
Ahị ka jẹ ọngọ nọ une gu awụlẹ.
Ang ọdanune a jẹ ya ẹla ịnọ,
Ụma nya ala ịlẹ kahị ka wo ka datị-datị.
Ang ọdanune a jẹ ya ẹla ịnọ,
ịyẹnọ bala ikolobya á ka chị ẹla bawụlẹ ka.
Ahì ka jẹ ẹla ịlẹ kị ya tawụlẹ bala ọngọ pịrị-awụle ju,
ahị ka jẹ ọnụ ọlẹ kị myị hawụlẹ bala ọngọlẹ kọ wẹ mọọnụ lẹlẹ-ẹ.
Ang ọdanune a jẹ ya ẹla ịnọ,
ụma nya ala ịlẹ kahị ka jẹ ka datị-datị.
Ang ọdanune a jẹ ya ẹla ịnọ,
ahì ka jẹ angịlẹ kí ka nọ une ká.
Ahị ka jẹ angịlẹ kị ka ọjịra-jịra nya alukpowu,
ahị jẹ ka angị wuleji hyị ang ọdanune ka ikwang lodu.
Ahị ka jẹ ọngọlẹ kọ nwụ ogu la odu ka ejiida la ẹnụ.
Ang ọdanune a jẹ ya ẹla ka odu-ịnyị,
ọgụ-ẹpẹtẹ nyang ka yang da odehe.
Ang ọdanune a jẹ ya ẹla ka odu-ịnyị;
ọọwa á kpa olo nyahị ụka kị mahị lẹ,
ọọwa á kpa olo nyahị ụka kahị ri ọngọgbahị lẹ.
Ọọwa á kpa olo nyahị ụka kahị la ogogo lẹ,
ọọwa á kpa olo nyahị ụka kahị ju ẹdụrụ lẹ,
ọọwa á tì ka kpa olo nyahị ini kahị kaa ka iworu lẹ
Ang ọdanune a jẹ ya ẹla ka odu-iịnyị, ọlahị ẹpẹpẹ ka.
Comments